Kaowao
စံခလပူရီ(၉-စက်တင်ဘာ)။ ။ စစ်အစိုးရ၏ ၂၀၁၀ ရွေးကောက်ပွဲဝင် သင့်မသင့် မဆုံးဖြတ်ကြရသေးသော်လည်း လာမည့် ရွေးကောက်ပွဲ ဥပဒေကို သုံးသပ်၍ ပါဝင်သင့်က အဆင်သင့် ဖြစ်နေစေရန် ရည်ရွယ်ပြီး မွန် နိုင်ငံရေးသမား စုစည်းကာ အဖွဲ့တစ်ဖွဲ့ စုဖွဲ့ထားပြီ ဖြစ်ကြောင်း ထိပ်တန်း အဖွဲ့ဝင်တစ်ဦး ဖြစ်သူ ဒေါက်တာ ဗညားအောင်မိုး က ထုတ်ဖေါ် ပြောကြားခဲ့သည်။
“ကျနော်က ဒီအဖွဲ့မှာ ပါဝင်သူ ဆိုပေမဲ့ ပြောရေးဆိုခွင့်ရှိသူတော့ မဟုတ်ပါဘူး၊ ဒါပေမဲ့ သိသင့်တဲ့ အချက်တစ်ချို့ကို ပြောပြလို့ရပါတယ်၊ အဓိက ရည်ရွယ်ချက်က အမျိုးသားပြန်လည် သင့်မြတ်ရေး လမ်းကြောင်းမှာ လျှောက်လှမ်းသွားနိုင်ဖို့ပါ၊ လစ်ဘရယ် လစ်ဇင် Liberalism ကို အခြေခံပြီး သွားဖို့ သင့်တော်တဲ့ မူတစ်ရပ်ကို အခြေခံပြီး ကျနော်ကပဲ ဦးဆောင် တင်ပြခဲ့ပါတယ်” ဟု ဆိုပါသည်။
ထို တတိယအင်အားစု မွန်နိုင်ငံရေး အဖွဲ့အစည်း၏ အမည်ကို အတိအကျ မသတ်မှတ်ရသေး၍ မထုတ်ပြန်သေးပေ။ မွန်ပြည်သစ် ပါတီဝင်ဟောင်းများ၊ အဖျက်သိမ်းခံ မွန်အမျိုးသား ဒီမိုကရေစီအဖွဲ့မှ လူလတ်ပိုင်း ခေါင်းဆောင်များ၊ ပညာရှင်များ၊ အငြိမ်းဆရာဝန်၊ ကျောင်ဆရာများ ပါဝင်ကြသည်ဟု သိရသည်။
အဆိုပါ အဖွဲ့အစည်းသစ်၌ မွန်ပြည်သစ်ပါတီမှ ဗဟိုအလုပ်အမှုဆောင်ဟောင်း နိုင်တင်အောင်၊ ဗဟိုကော်မတီဝင်ဟောင်း နိုင်မြင့်ဆွေ (ဗိုလ်မှူးကြီးဟောင်း လဝီအောင်)နှင့် နိုင်စိုးမြင့် တို့ ပါဝင်သည် နိုင်အောင်မိုးက ပြောကြားခဲ့သည်။
ပညာရှင်များအုပ်စုတွင် အငြိမ်းစား ပြည်နယ် ကျန်းမာရေးအရာရှိ ဒေါက်တာ မင်းနွယ်စိုး၊ အငြိမ်းစားပြည်နယ် ပညာရေးမှူး နိုင်ငွေသိန်းတို့ ဦးဆောင် ပါဝင်ကြသည်ဟု သိရသည်။
မွန်အမျိုးသားဒီမိုကရေစီအဖွဲ့မှ ဒေါက်တာ မင်းစိုးလင်း၊ ဒေါက်တာ မင်းကြည်ဝင်း၊ တက္ကသိုလ် နည်းပြ ဆရာဟောင်း မွန်ရာဇာ တို့ ပါဝင်ကြသည်ဟု ဆိုသော်လည်း ကာယကံရှင်များက အတည်ပြု ပြောကြားခြင်း မပြုသေးပေ။ မွန်အမျိုးသား ဒီမိုကရေစီအဖွဲ့သည် ၁၉၉၀ ရွေးကောက်ပွဲတွင် လွှတ်တော် ကိုယ်စားလှယ်လောင်း ၁၉ ဦး ပါဝင် ယှဉ်ပြိုင်ခဲ့ရာ အမတ် ၅ နေရာ ရရှိခဲ့သည်။ ခေါင်းဆောင်များကိုလည်း မကြာခဏ စစ်ဆေးဖမ်းဆီးမှုများ ပြုလုပ်ခဲ့ပြီး ၁၉၉၂ ခု၊ မတ်လ ၁၉ ရက်နေ့၌ စစ်အစိုးရက တရားဝင် ပါတီမှ ရပ်စဲလိုက်သည်။ လက်ရှိတွင် လာမည့် ၂၀၁၀ ရွေးကောက်ပွဲကို လက်မခံနိုင် ဟု ပါတီထိပ်ပိုင်း ခေါင်းဆောင်များက သတင်းမီဒီယာများကို ဖွင့်ဟ ပြောဆိုခဲ့ကြသည်။
ထို့အတူ မွန်ပြည်သစ်ပါတီသည်လည်း နယ်ခြားတပ် အသွင်ပြောင်းလဲရေးကို လက်မခံကြသည့်အပြင် ၂၀၁၀ ရွေးကောက်ပွဲကို ဝင်မည် မဟုတ်ကြောင်း အတိအလင်း ထုတ်ဖေါ် ပြောကြားခဲ့ပြီး ဖြစ်သည်။
စစ်အစိုးရ တိုင်းမှူးနှင့် မွန်ပြည်သစ်ပါတီ ထိပ်ပိုင်းခေါင်းဆောင် ၃ ဦးတို့ လွန်ခဲ့သည့် သြဂုတ်လ ၂၈ ရက်နေ့က မော်လမြိုင်မြို့၌ ထပ်မံ တွေ့ဆုံခဲ့ကြပြီးနောက် လာမည့် မကြာခင် ရက်ပိုင်းအတွင်း မွန်ပြည်သစ်ပါတီ ဗဟိုကော်မတီ အရေးပေါ် အစည်းအဝေးတစ်ရပ် ကျင်းပရန် ရှိကြောင်း ဗဟိုကော်မတီဝင်တစ်ဦးက ထုတ်ဖေါ် ပြောကြားခဲ့သည်။
အဆိုပါ နိုင်ငံရေး အခြေအနေ မတည်ငြိမ်မှု ဖြစ်ပေါ်နေသည့် လတ်တလော ကာလ၌ မွန်ပြည်သစ်ပါတီ ဗဟိုကော်မတီဝင်များ ဖြစ်ကြသည့် နိုင်ဥာဏ်ထွန်း၊ နိုင်လဝီမွန်၊ စစ်ဦးစီးမှူး ဗိုလ်မှူးကြီး ကိုတာ တို့ နှုတ်ထွက်စာ အသီးသီး တင်ထားကြပြီဟု သိရသည်။
အလားတူ မွန်ပြည်သစ်ပါတီအား စစ်အစိုးရနှင့် အပစ်အခတ် ရပ်စဲရေး ပြုလုပ်လာစေရန် ဖြောင်းဖြနားချခဲ့သော KIO ကချင် လွတ်လပ်ရေးအဖွဲ့မှ ဝါရင့်ခေါင်းဆောင် ဒုဥက္ကဌ ဒေါက်တာတူးဂျာ အပါအဝင် ထိပ်ပိုင်း ခေါင်းဆောင် ၆ ဦးလည်း အသီးသီး နှုတ်ထွက်ခွင့် ရခဲ့ပြီး ၂၀၁၀ ရွေးကောက်ပွဲ ဝင်နိုင်ရန် ကချင်ပြည်နယ် တိုးတက်ရေး ပါတီ KSPP ကို ဖွဲ့စည်းရန် ပြင်ဆင်နေကြပြီ ဟု သတင်းများတွင် ဖေါ်ပြကြသည်။
0 comments:
Post a Comment